Ќе успее ли Грција за три дена да ги исполни условите за финансиска помош?!

Добивај вести на Viber

Рок од три дена има Грција за да ги убеди своите кредитори дека може да ги исполни условите поврзани со пакетот меѓународна финансиска помош, а кои се неопходни за да ја прими новата транша од кредитот, наведоа денес официјални лица од еврозоната.

„Постои незадоволство во врска со напредокот на реформите на грчкиот јавен сектор, вклучувајќи даноци, собирање царина и услуги за здравствена заштита, истакна за „Ројтерс“ официјално лице од монетарната унија, кое учествува во преговорите.

За да го засилат притисокот врз владата во Атина да ги спроведе ветените реформи, кредиторите Европската унија и Меѓународниот монетарен фонд можат да ја скратат еднократната исплата на траншата и да ја поделат на три месечни исплати, пишуваат грчките медиуми.

Во понеделникот тие ги продолжија разговорите за одмрзнување на траншата од 8,1 милијарди евра, по двонеделната пауза период во кој владата на Грција го избегна паѓањето поради укинувањето на сигналот и врачувањето откази на вработените во државната радио-телевизија ЕРТ.

„Сите се согласија дека Грција мора да ги исполни ветувањата пред состанокот на еврогрупата кој е закажан за понеделник. Затоа во петок мора повторно да извести за постигнатиот напредок", рекол за „Ројтерс“ уште еден неименуван соговорник од еврозоната.

 „Преговорите се многу тешки. Брзаме за во што покус временски рок да решиме што повеќе прашања", рекол анонимен грчки функционер кој учествува во преговорите со меѓународните доверители на Атина.

Министерите за финансии на еврозоната ќе се сретнат на 8-ми јули, за да разговараат за состојбата со Грција.