Кочо Анѓушев ја напушти ЕФТ, фирмата која е најголем увозник на струја во Македонија!

Добивај вести на Viber

По речиси десетгодишно управување со ЕФТ Македонија, една од најголемите компании за трговија со струја во земјава, бизнисменот Кочо Анѓушев ја напушти челната позиција. На негово место доаѓа дипломираниот економист Иван Џенингс, кој од 2002 година е дел од ЕФТ групацијата (Energy Financing Team). Во октомври минатата година, Анѓушев ја основаше Енерџи деливери солушнс ЕДЦ, компанија која според објавата во Централниот регистар ќе се занимава со трговија со електрична енергија. Со основачки влог од 5.000 евра, покрај Анѓушев, сопственик на новата фирма е и Фероинвест од Велес, компанија која во 2003 година ја основаше Анѓушев. Овој бизнисмен  е и инвеститор на неколку мали хидроцентрали во Македонија. Последните финансиски податоци покажуваат дека во групата најголеми и најуспешни трговци со струја во земјава влегуваат ЕФТ Македонија, ГЕН-И, Роу енд рифајнд комодитис, Руднап и ЕВН трејдинг. Овие пет трговци со струја во 2011 година остварија добивка од 1,7 милион евра, која пак, во 2010 година достигна 2,7 милиони евра. Приматот - најголем и најуспешен трговец со струја во земјава за 2011 година го има ГЕН-И, со профит од речиси два милиони евра, што е раст на добивката од 46,5% за само една година. Ако се анализираат приходите и расходите на трговците со струја, втор по успешното работење во 2011 година е трговецот ЕФТ Македонија, кој пред две години оствари нето-добивка од 709.973 евра, што е 20,6% повеќе од профитот „тежок“ 590.429 евра во 2010 година. На страната на приходите пак, овој трговец со струја во 2011 година имаше приход од 106 милиони евра, што е 49,6% помалку во споредба со инкасираните 166 милиони евра во 2010 година.