Кои се кавадаречките милионери? Уживаат во вино и серенади и знаат да прават многу пари!

Добивај вести на Viber

Бројките укажуваат на заклучок дека Кавадарци е економски е најуспешниот град во Македонија од аспект на силни домашно поседувани компании. И му нема рамен. Веројатно е до поднебјето, генот, виното и серенадата. Секако и маџунот како двигател. Зошто? Па затоа што само во Кавадарци домашно поседуваните големи компании не само што се рамо до рамо со странските аквизиции и гринфилд инвестиции, туку се и посилни од нив!

Кавадарци е град на виното и серенадите, најпознатата староградска македонска музика. Родното место на бардот Никола Бадев и на ненадминливиот шмекер и поп пејач Зафир Хаџиманов. Град во кој традиција е на секаков повод и собирање да се запее традиционална најубава македонска староградска песна. А песната не оди без вино и ракија. Кавадарци е центарот на македонската винска индустрија, срцето на Тиквешијата во која речиси и нема домаќинство кое не прави жолта ракија или домашно вино.

Но Кавадарци е и индустриски центар - град на никелот и на челичната индустрија. А во последно време е седиште на голема фабрика за делови од автомобилската индустрија, која стана точка на мапата на голема интернационална автомобилска корпорација, која е снабдувач на големите светски автомобилски производители. За производството на вино и ракија нема збор. Тука ниту регионот наскоро нема да биде лимит.

Кавадарчани пеат, прават вино и маџун, но знаат да прават и пари. Некои до нив се мастер-мајндови и мега мајстори за правење пари и развивање бизниси на кои можат да им позавидат многу бизнисмени во земјава, но и во регионов.