Кои земји нудат најдобри можности за вработување на младите?

Добивај вести на Viber

Иако високото образование сè уште носи подобри шанси на пазарот на трудот, многу млади дипломирани студенти низ Европа се соочуваат со голема конкуренција и бавно вработување.

Според податоците на Евростат, просечната стапка на вработеност кај лицата на возраст од 20 до 34 години кои дипломирале на факултет во последните три години била 84,9 oтсто во 2024 година. Сепак, разликите меѓу земјите се огромни, од помалку од 65 отсто до речиси 94 отсто. 

Дипломираните студенти во северните и централните европски земји имаат најголеми можности за работа, каде што стапката на вработеност надминува 90 отсто. Од друга страна, југот и југоистокот на Европа имаат значително полоши резултати, во некои земји помалку од четири петтини од високообразованите млади луѓе се вработени, пишува Euronews Business.

Податоците покажуваат и изразени разлики меѓу половите. Во просек, 86 отсто од мажите со завршено високо образование наоѓаат работа во рок од три години, во споредба со 84 отсто од жените. Сепак, во осум земји жените имаат поголема вработеност од мажите, најмногу во Грција, Хрватска и Шпанија. Од друга страна, најголемата разлика во корист на мажите е забележана во Турција, Словенија, Латвија и Србија.

Во споредба со најразвиените економии, Германија е на врвот со речиси 92 отсто вработени дипломирани студенти, додека Италија и Франција заостануваат, повеќе од една петтина од младите луѓе со високо образование не се вработени таму.

Без оглед на разликите, трендот е јасен, високото образование продолжува значително да влијае на животниот стандард. Во просек, луѓето со универзитетска диплома во ЕУ заработуваат 38 отсто повеќе од оние со средно образование, па дури и 68 отсто повеќе од луѓето со ниски квалификации.