КОЈ И ЗОШТО ПРОТЕСТИРА: Граѓаните нервозни, блокиран центарот на Скопје кај Собрание
Објавено во: Македонија 13 Септември, 2019
Во моментов центарот во главниот град е под блокада. Причина е протестот на поранешни вработени во „Охис“ кои што си ги бараат платите. Токму тој протест ги пренасочи и автобусите и сообраќајот кој поминува кај Рекорд во најголемата гужва денеска.
Граѓаните нервозни реагираат зошто токму најфрекфентните улици секогаш се блокираат во време кога се оди на работа.
Поранешните работници на „Охис“ бараат да им се исплатат 24 заостанати плати, обврска уште од 2008, 2012 и 2013 година.
Неодамна премиерот се огради од проблемите на вработените и рече дека нема предвидено пари за исплата на неисплатените плати на поранешните вработени во компанијата во доминантна државна сопственост, ОХИС, бидејќи компанијата е во стечај кој го води правосудната власт.
-Таму станува збор за стечајна постапка која си ја води Судот. Владата не планира да се меша во работата на правосудната власт, стечајни управници и слично. Не сакаме да им наложуваме на судии како да работат, потенцираше Заев.
Како што е познато „Охис“ на работниците им должи 24 плати, 8 плати од 2008 година и 16 плати од 2012 и 2013 година. Според нив, работата само се одолговлекува, но сепак се надеваат дека парите ќе им бидат исплатени.