Кој ќе ја гради новата зграда на Министерството за финансии?!?

Добивај вести на Viber

Министерството за финансии одново бара градежна компанија која овој пат навистина ќе ја доизгради поранешната зграда на Југобанка, објект кој се простира на површина од 14.000 метри квадратни. Откако пред половина година Министерството го раскина договорот за градба со словенечката компанија Енергоплан, сега бара фирма која ќе ги изведе градежните, градежно занаетчиските и инсталатерските работи, како и внатрешното и надворешното уредување на објектот. Градежните компании кои до сега имаат изведено најмалку три објекти од високоградба во последните пет години, чијашто вкупна квадратура не е помала од 10.000 метри квадратни со вкупна вредност поголема од 10.000.000 евра можат да ги достават понудите најдоцна до 30 јануари следната година. Од понудувачите се бара и да имаат лиценца „А“ за изведување. „Компанијата треба да има високо стручен кадар кој ќе биде ангажиран за реализација на предметот на набавката и тоа за главен инженер за изведба - раководител на градба - архитект или градежен инженер со работно искуство над 10 години и овластување „А” издадено од Комората на овластени архитекти и инженери на Македонија, минимум двајца дипломирани инженери архитекти или дипломирани градежени инженери, најмалку по двајца дипломирани електро и машински инженери со овластување „А” издадено од Комората, како и најмалку пет дипломирани градежни инженери со овластување „А” издадено од Комората на овластени архитекти и инженери. Главниот инженер за изведба - раководител на градба да бил главен инженер на градба на минимум три изведени објекти/градби од високо градба во последните пет години во земјата или странство, а чијашто површина кумулативно не е помала од 5.000 метри квадратни“, стои во огласот од Министерството. Од потенцијалниот инвеститор се бара и да располага и со своја опрема и механизација. Министерот Зоран Ставрески се решава на овој чекор откако словенечката градежна компанија Енергоплан која требаше до сега да ја доврши градбата на поранешна Југобанка, се соочи со финансиски проблеми и не стигна на време да го сработи договореното, по што Ставрески го раскина договорот. Активирана е и банкарската гаранција на Енергоплан од околу 2,3 милиони евра. Во новата админситративна 11-то катница покрај Министерството за финасии планирано е да се сместат и Бирото за јавни набавки, Државниот девизен инспекторат и Управата за имотно-правни работи.