Кој ќе ја придвижи македонската индустрија годинава?

Добивај вести на Viber

Главните индустриски сектори на кои се потпираше домашната економија лани беа заглавени во тешка криза, но судејќи според произведеното во првиот месец и годинава нема да има големи промени. Најновите статистички податоци покажаа дека индустриското производство во јануари годинава паднало за 1,3% во споредба со истиот месец од лани, што е всушност седумнаесетти  последователен статистички пад. Според податоците на Државниот завод за статистика, најголем пад е забележан во металната индустрија од 34,3%, но и во преработувачката индустрија од 4,5%. Се уште во добра кондиција се рудниците, бидејќи податоците покажуваат дека во секторот рударство, производството бележи раст од 17,6%. Според последните податоци, падот во металската индустрија лани за цела година достигна дури 10,7% во споредба со претходната година. Исклучително тешките услови за работа предизвикани од кризата ги оценија и од најголемиот извозник  Макстил во својот извештај за работата од лани. „Во вакви сложени услови на стопанисување бевме принудени да извршиме измени во нормалниот режим на работење со воведување на мали производни кампањи заради рационализација на трошоците. Ваквите адаптации се истовремено неопходни заради подготвеноста да одговори на нарачките со краток рок на испорака што денес во вакви услови на работење станува производен императив“, ,велат од Макстил. За годинава, во металуршкиот сектор немаат оптимистички очекувања, евентуално раздвижување очекуваат на крајот на првиот и на почетокот на вториот квартал од 2013 година. Во првиот месец од годинава, пад на производството е забележан и во секторот снабдување со електрична енергија и гас, а забавило и производството на електрична опрема каде е забележан пад од дури 30,7%. Единствено позитивно придвижување е забележано во текстилната индустрија, каде во јануари е регистриран раст на производството од неверојатни 164%. Може ли Бунарџик да го “крене“ индустриското производство? Извозот од Бунарџик, односно од Џонсон контролс и Џонсон Мети лани претставуваше 16,3% од вкупниот извоз на земјата. Со оглед на тоа дека од крајот на минатата година, во индустриската зона, со производство почнаа и новите фабрики како што се Кемет, Продис и Текнохозе, а до средина на годинава со производство ќе почне и белгиската фабрика за автобуси Ван Хол,  очекувањата се дека е можно дополнително зголемување на извозот но и раст на индустриското производство. Според проценките на Владата за годинава, индустријата до крајот на годината се очекува да закрепне и да оствари минимален годишен раст од 2,3%. Народната банка пак, веќе прогнозираше дека годинава се очекува раст на извозот, базиран на структурните промени во економијата и закрепнување на економиите во еврозоната. Позитивни проекции, гувернерот Богов има за извозот, кој освен годинава, ќе забележи силен раст и во 2014 година, што ќе биде резултат на опоравување на странската побарувачка и светските цени на металите. С.Н

		Движење на индустриското производство
	сеп.11			-2,3%
	окт.11			-3,8%
	ное.11			-5,3%
	дек.11			-4,8%
	јан.12			-8,0%
	фев.12			-8,8%
	мар.12			-8,5%
	апр.12			-7,2%
	мај.12			-5,4%
	јун.12			-4,1%
	јул.12			-6,9%
	авг.12			-8,1%
	сеп.12			-5,6%
	ное.12			-4,4%
	дек.12			-8,0%
	јан.13			-1,3%
					Државен завод за статистика