КОЈ ЌЕ БИДЕ НАЈМНОГУ ПОГОДЕН ОД АМЕРИКАНСКИТЕ ЦАРИНИ ВО ЕУ И ЗОШТО? Еве која земја е прва на удар

Добивај вести на Viber

Ирска, Германија и Италија се соочуваат со потенцијални загуби од милијарди долари ако претседателот Трамп ја оствари својата закана за воведување царини од 30 проценти на европските производи.

Не сите европски земји се подеднакво изложени на американскиот пазар и затоа нема да претрпат исти последици ако претседателот Доналд Трамп ги оствари своите закани и воведе царини од 30 проценти на Европската Унија (ЕУ), објави АФП во неделата.

ИРСКА – ПРВА ЛИНИЈА НА УДАР

Ирска, со својата важна фармацевтска индустрија, е на првата линија на ударот, заедно со Германија, за која САД се главен пазар за автомобили, челик и машински алати. Франција е помалку изложена, иако има компании за аеронаутика и храна и производители на вино и луксузни стоки кои ризикуваат да изгубат пазари. ЕУ како целина има годишен трговски суфицит со САД од 235,6 милијарди американски долари, според Бирото за економски анализи на САД (BEA), кое известува за Министерството за трговија.

Само во случајот со Кина овој суфицит е поголем. Ирска има најголем суфицит од членките на ЕУ, 86,7 милијарди долари, најмногу благодарение на присуството на водечките американски фармацевтски компании како што се „Фајзер“, „Ели Лили“ и „Џонсон и Џонсон“. Сите тие се населиле во Ирска за да ја искористат стапката на корпоративен данок од 15 проценти, која во САД е 21 процент. Овие компании ги поднесуваат своите патенти во Ирска и ги продаваат на американскиот пазар, каде што цените на лековите традиционално се повисоки отколку во остатокот од светот. Ирска е исто така домаќин на европското седиште на американските технолошки гиганти како што се „Епл“, „Гугл“ и „Мета“, кои исто така беа привлечени од ирскиот даночен систем. Генерално, фармацевтските производи сочинуваат 22,5 проценти од извозот на ЕУ во САД, според Евростат, при што главните играчи најавуваат големи инвестиции во САД.

ГЕРМАНИЈА

Германија, најголемата економија во Европската Унија, е под посебен притисок поради нејзината зависност од извозот - земјата има трговски суфицит со САД од 84,8 милијарди долари, најмногу благодарение на автомобилската, хемиската, челичната и машинската индустрија. САД сочинуваат 23 проценти од приходите на „Мерцедес Бенц“. Иако дел од приходите доаѓаат од теренски возила произведени во САД за извоз, постои ризик сегментот да биде силно погоден ако ЕУ одлучи да возврати во царинска војна. Федерацијата на германски индустрии (BDI) брзо реагираше на објавата на Трамп во саботата, повикувајќи ги ЕУ и САД „брзо да најдат решенија и да избегнат ескалација“.

ИТАЛИЈА, ФРАНЦИЈА....

Италија, со трговски суфицит со САД од 44 милијарди долари и Франција со 16,4 милијарди долари, според американската статистика (француските податоци покажуваат дека суфицитот е многу помал), би биле помалку погодени, но некои сектори се многу изложени. Во обете земји, прехранбената и винската индустрија би биле силно погодени, како и Шпанија. Тарифите од 30 проценти би биле „катастрофални“ за француските вина и жестоки пијалоци, рече Жером Деспи, раководител на синдикатот за вино FNSEA. Coldiretti, главното земјоделско здружение во Италија, изјави во саботата дека тарифите од 30 проценти би ги чинеле американските потрошувачи и италијанските производители на храна околу 2,3 милијарди долари. Како и Германија, Италија е загрижена за својата автомобилска индустрија. Француско-италијанскиот производител Стелантис (поточно Фиат и Пежо) ги одложи своите прогнози и проекции за оваа година поради неизвесност околу царините.

Секторите за аеронаутика и луксузна стока во Франција се исто така многу изложени. LVMH, најголемиот светски конгломерат за луксузна стока, остварува една четвртина од својата продажба во САД. Околу една петтина од извозот на Франција во САД оди во аеронаутичката индустрија, поголемиот дел од него во Ербас. Австрија и Шведска, исто така, имаат трговски суфицит со САД од 13,1 милијарди долари и 9,8 милијарди долари.