Која банка планира голема петгодишна офанзива на македонскиот пазар?

Добивај вести на Viber

Раст на кредитирање за 40 отсто во период од пет години, раст на добивката секоја година, а во 2025 до 10 милиони евра. Раст на нето приходи од камати за 38 отсто за пет години, раст на депозити, раст на приходи од провизии. Се ова е дел од амбициозниот план на „Охридска банка“ дел од групацијата на „Шпаркассе банк“ на македонскиот пазар  

„Охридска банка“ која е дел од групацијата на „Шпаркассе банк“ во Македонија има одлични и големи планови за својата среднорочна иднина, кои се достапни за потенцијалните инвеститори на информативниот сервис СЕИ НЕТ на „Македонската берза“. Плановите и очекувањата се големи и се реални ако се знае дека станува збор за голема регионална банкарска групација која годинава што иде на нашиот пазар ќе обедини две деловни банки.

Оваа банка, која е една од петте најголеми домашни банки, планира во наредните четири години да ја зголемува добивката (пред оданочување) во континуитет, а таа во 2025 година треба да достигне 10,9 милиони евра што би било повеќе од дупло во однос на планираната за 2021 година  за кога би требало да достигне 4,6 милиони евра.

Главните изворни приходи на банката во овој период ќе останат „нето приходите од камати“. Тие за годинава се очекува да бидат 16,4 милиони евра, а за пет години од сега (2025 година) се проектирани да пораснат до 22,6 милиони евра. Нето приходите од провизии остануваат како втора најголема приходна ставка и тие до 2025 година се очекува да стигнат до 7,3 милиони евра од сегашните (за 2020 г.) кои се реализираат на ниво од 3,9 милиони евра.

Банката планира значајно да ги зголеми трошоците за плати на своите вработени. Имено буџетот за плати годинава е 5,4 милиони евра, за до 2025 година постојано да расте и тогаш да достигне 6,6 милиони евра. Општите и административните трошоци на банката за до 2025 година треба да пораснат за 3 милиони евра до 14,7 милиони евра во 2025 година.

Очекувано на резервациите ќе влијаат амбициозните деловни зафати на банката во идните пет години. Од сегашното ниво 34,2 милиони евра до 56,8 милиони евра на крајот на 2025 година.

На страната на билансот на состојба плановите за најважните активности се насочени кон универзалните банкарски услуги: кредитирањето и прибирањето депозити. Кредитирањето за пет години треба да достигне 759,3 милиони евра што е за 216 милиони евра повеќе од годинава.

Кај депозитите на крај на годинава вкупното конто ќе биде 472,3 милиони евра, а за пет години линеарно треба да расте и да достигне 681,9 милиони евра.