КОРИДОР 10: Не е меѓу најважните во ЕУ, но за Демир Капија-Смоквица нема пречка!

Добивај вести на Viber

Доизградбата на Коридорот -10, односно делницата Демир-Капија –Смоквица – не е доведена во прашање, објаснуваат од министерството за транспорт и врски, по информациите дека Европската унија од својата единствена трансевропска сообраќајна мрежа го исфрлила Коридорот 10, кој е главна трансверзала што поминува низ Македонија. „Доизградбата на Коридорот X, односно делницата Демир Капија-Смоквица не е доведена во прашање, со оглед дека се работи за ИПА алокации од програмскиот период 2007-2013 во висина од 45 милиони евра и кои досега се во целост искористени. Реализацијата на градежните активности на делницата се одвиваат согласно предвидената динамика“, додаваат од министерството. Објаснуваат дека министерството за транспорт и врски е во процес на подготовка на Оперативната програма за секторот Транспорт 2014-2020 за искористување на фондовите од Европската унија. Тоа е продолжение на претходната Оперативна програма за регионален развој 2007-2013 со цел  да се задржи континуитетот на инвестициите. „Оттука, запазен е принципот на инвестиции на европските коридори во Република Македонија,  Коридор X, X- д и VIII а согласно ЕУ регулативата 1315/2013, како и согласно целите дефинирани во Националниот стратешки документ, потенцираат од ресорното министерство за транспорт и врски. При тоа, потенцират дека Коридорот 10 и натаму е на листата на Европската мапа, во делот кој се однесува на Западен балкан. http://ec.europa.eu/transport/infrastructure/tentec/tentec-portal/site/en/maps.html Информацијата дека Европа го избришала Коридорот 10 од приоритетна листа, стигна од Србија. Опозициската Демократска партија на Србија (ДСС) ја обвини тамошната влада дека веќе една година крие оти овој коридор не е меѓу приоритетите за ЕУ. Наместо овој, во деветте клучни коридори кон кои се насочува поддршката на Европската унија, само еден поминува низ регионот – Коридорот Ориент-Источен Медитеран, кој како рута, наместо патниот правец Србија-Македонија-Грција, поминува низ Романија-Бугарија-Грција. Кон овој коридор и останатите осум наведени во оваа приоритетна ЛИСТА ќе биде насочена европската финансиска поддршка за периодот 2014-2020 година, напишаа српските медиуми.