Коридорот 8 на пат- ќе се потпише договор за изработка на пругата Бељаковце – Крива Паланка

Добивај вести на Viber

Македонски железници - Инфраструктура денеска ќе потпише договор со компанијата „Obermeyer Hellas Ltd“, за изработка на основен проект за пругата Бељаковце - Крива Паланка, која е дел од Коридорот 8.

За целокупната проектна документација е обезбеден грант од ЕБОР од 2,5 милиони евра и се очекува таа да биде завршена до крајот на годинава за да може на Бордот на ЕБОР да бидат одобрени средства и за реализација на втората фаза.

Третата фаза ќе го опфати делот од Крива Паланка до границата со Бугарија.

За првата делница Куманово - Бељаковце која е планирано да заврши до 2017 година се обезбедени 46,4 милиони евра од Европската банка за обнова и развој.

На денешното потпишување ќе присуствува министерот за транспорт и врски Миле Јанакиески.

Јанакиески претходно за „Дневник“ рече дека станува збор за договор меѓу „МЖ Инфраструктура“ и компанијата „Обермајер“ за изработка на основни проекти, како и потребната документација за избор на градежна компанија за делницата Бељаковце- Kрива Паланка, која е во должина од 34 километри.

Ангажманот на консултантот ќе биде две години, од кои 18 месеци ќе бидат наменети за изработка на основни проекти, а последните 6 месеци ќе се спроведува постапката околу изборот на градежната компанија.