Добивај вести на Viber
Велешани се чини може да здивнат откако и Советот на Општина Велес, даде зелено светло за бришење на Топилницата од картата на градот. На денешната седница советниците ја ја усвоија предлог-одлуката за изменување и дополнување на ГУП-от на Велес. Со ова на просторот кај Топилницата треба да никне зелен појас.
Александар Колев, претседател на Советот на Општина Велес истакна дека Топилницата или било кој тежок загадувач повеќе нема да работи среде Велес, а процедурите за добивање на дозвола за работа подразбираат аплицирање на инвеститорот, како што е сега тоа со „Метрудхем“ до надлежните Министерства, тоа за транспорт и врски и за животна средина.
Оттука, ако локацијата каде што ги предвидуваат своите активности со урбанистичкиот план не е предвидена намена за загадувачка индустрија, тие не ќе можат да добијат согласност, односно дозвола за работа.
„Но, ова не значи дека завршува борбата за спас на Велес од Топилницата и борбата за здрава животна средина на Велес.Напротив треба да се превземат уште мерки, како што е дислокација на јаловината на згура или црниот рид над Топилницата, а кој е се уште опасност за градот, ќе треба да се превземат мерки за фиторемедијација или било која друга форма на прочистување на почвата на јавните површини во Велес, како и активности за дислокација на самите објекти од Топилницата“, рече Колев.
За таа цел, најави, Советот на Општина Велес ќе донесе решение со кое ќе именува нови членови во Одборот за спас од Топилницата, а на кои им е престанат мандатот, да ги продолжат овие зацртани активности во наредниот период.
Претходно и Министертсво за транспорт и врски до Општината Велес достави одобрение на промена на урбанистичкиот план.Велешани иницијативата ја дадоа пред две години, по што се чекаше Министерството за транспорт и врски да дозволи промена на ГУП-от, што сега ja усвои и Советот на општината.
Како голем проблем за Велес сега останува згурата, бидејќи во депонијата од топилницата создавана 3 децении има 900 илјади тони оловна, цинкова и кадмиумова згура која е исто опасна колку и фабриката, предупредуваат експертите.