Криминална група издавала грчки пасоши на криминалци од други држави
Објавено во: Балкан 01 Декември, 2021
Грчката полиција разби криминална организација што нелегално издавала грчки пасоши и документи на криминалци од други земји.
За 30.000 евра од документ, странски државјани со тешко криминално досие, добивале оригинални грчки пасоши или лични карти или било каков друг документ преку „услугите“ на криминалната организација што денеска ја разби грчката полиција, а била активна најмалку осум години и уапсени се 20 лица меѓу кои и полицајци, јави дописничката на МИА од Атина.
Се проценува дека вкупната финансиска корист што ја добила криминалната организација е најмалку пет милиони, а полицијата по неколкумесечна истрага ја разбила мрежа и меѓу 20-те уапсени лица девет се полицајци, еден е вработен во Министерството за цивилна заштита (во чија надлежност е полицијата), еден вработен во матичната служба, еден адвокат и осум граѓани, но постојат податоци дека биле вклучени 34 полицајци.
Криминалната организација составена главно од Грци, но и повратници од поранешни земјите на Советскиот сојуз, полицајци и други државни службеници, била активна најмалку од 26 април 2013 година и имала развиено мрежа на соработници и „издавала оригинални грчки лични карти, грчки пасоши и возачки дозволи на странски државјани со тешко криминално досие“.
Слична афера имаше и во Македонија, со издавање на пасоши на криминалци од други земји. Над 200 луѓе на ваков начин добиле македонски пасош.