Криза мермер не гризе! Која прилепска компанија и скрши заби на инфлацијата?

Добивај вести на Viber

Извозот на Мермерен комбинат лани надмина 29 милиони евра колку што е речиси и целата продажба. Добивката на компанијата во услови на силна инфлација изнесува 13,7 милиони евра. Од целиот годишен приход лани во добивка останале 47 отсто, што е фантастичен резултат што им конкурира дури и на големите домашни банки

Мермерниот комбинат Прилеп имаше одлична година во услови на неизвесно и непредвидливо деловно опкружување, покажуваат резулатите од неговите финансиски извештаи.

Приходите од продажба на Мермерен комбинат не претрпеле никакво влијание од инфлацијата со која се соочува националната, но и глобалната економија. Официјалните податоци за 2023 година покажуваат дека компанијата остварила приходи од 29,3 евра. Извозот на прилепски мермер лани донел 29,15 милиони евра и тоа е безмалку индентично ниво како и претходната година.

Најголемата расходна ставка се збирните трошоци за суровини и други материјали и тие изнесуваат 4,47 милиони евра и дури во споредба со претходната година се намалени за 10 отсто. Тоа е резултат за почит особено заради тоа што во овој период инфлацијата негативно влијаеше врз глобалниот, но и врз регионалниот пазар на стоки услуги. Очигледно дека Мермерен комбинат Прилеп има формула со која успешно се справува со инфлаторни притисоци.

Втора најголема расходна ставка се трошоците за вработените кои изнесуваа 4,1 милиони евра и се за 2 отсто повисоки од претходната година.

Оперативната добивка од работењето на оваа компанија изнесува 14,87 милиони евра и е пониска само за 3 отсто во однос на 2022 година. По соочувањето на финансиските приходи со финансиските расходи компанијата излегла добитна за уште 50.000 евра.

Нето добивката на ова друштво изнесува 13,7 милиони евра и тоа е речиси идентично со претходната споредбена година. Добивката по акција за 2023 година изнесува 3 евра.

Оваа компанија е позната по тоа што дели пристојна или солидна дивиденда. Последната дивиденда во бруто износ беше 250 денари по акција што е 10 отсто од последната пазарна цена која изнесуваше 2.575 денари за акција.