Квалитетните македонски вина имаат високо заштитно дејство врз здравјето на луѓето

Добивај вести на Viber

„Умерената консумација на вино е поврзана со намален ризик од кардиоваскуларни болести, подобри когнитивни функции и намалена смртност меѓу лица од средна и подоцнежна возраст“ вели меѓудругото проф. д-р Виолета Иванова – Петропулос во интервјуто за Фактор. Во него таа се осврнува и на резултатите од нејзините најнови научни истражувања кои неодамна беа јавно презентирани на првата стручна конференција за влијанието на умерената консумација на вино врз здравјето што ја организираше винарската визба „Тиквеш“ во рамки на комуникациската платформа „Вредности на виното“ Вие бевте дел од поголем истражувачки тим кој имаше за задача да ги проучи фенолните соединенија и антиоксидантната активност на македонски вина. До какви сознанија дојдовте во рамки на истражувањето? Во Македонија постои долга традиција за производство на вино, а тоа пред сѐ се должи на исклучително специфичната клима која на македонските вина им дава уникатни својства. Се разбира за да се задржат истите својства во виното по преработката на грозјето важно е да се користи модерна и софистицирана технологија која ќе го овозможи тоа. Како резултат на долгата традиција и специфичните својства на македонските вина, денес, виното претставува најзначаен производ во извозот на пијалоци и придонесува за девизните приходи на земјата. За да се постигне зголемување на понатамошниот извоз, како и конкурентност на македонското вино, освен основните параметри, важно е и да се истакнат специфичните својства на нашите вина. Досега, заедно со соработниците, домашни и странски, имаме направено доста истражувања на македонските вина, објавени во меѓународни списанија. Ова истражување е дел од научната работа фокусирана на проучување на составот на македонските вина и нивното влијание врз здравјето на луѓето. Имено, во истражувањето детално е проучен фенолниот состав на црвени македонски вина со примена на најсофистицирана техника за определување (течна хроматографија со УВ-Вис и електроспреј масена спектрометрија). Беше утврдено дека македонските вина се богати со феноли, сите се силно обоени и имаат сложен полифенолен профил. Определени беа 60-тина поединечни биоактивни соединенија кои поседуваат антиоксидантни својства, значајни за здравјето на луѓето. Еден дел од нив се биоактивни феноли кои се редовно присутни во црвените вина, без разлика на нивното потекло и сорта, а во нашите вина за прв пат беа определени сложени пигменти, хидроксифенил - пираноантоцијани. Бидејќи полифенолите се антиоксидантни соединенија, односно имаат способност да ги „фаќаат“ радикалите кои предизвикуваат оштетувања на клетките, канцерогени заболувања и сл., беше измерена нивната антиоксидантна активност. Резултатите покажаа дека сите вина кои ги анализиравме поседуваат висока антиоксидантната активност, што значи дека имаат високо заштитно дејство врз здравјето на луѓето. Овие соединенија се стабилни и освен позитивното влијание врз здравјето на луѓето овозможуваат црвената боја на вината да остане непроменета во текот на нивното чување и стареење, штитејќи го од расипување и појава на непријатни мириси. Кои македонски вина беа користени во истражувањето? Во истражувањето беа анализирани црвени вина од три сорти на грозје: вранец, каберне совињон и мерло од три години на берба (2008, 2009 и 2010) произведени во ВВ „Тиквеш“. Целта беше да се направи споредба на фенолниот состав и антиоксидантната активност на сортата вранец, најраспорстранетата сорта во Македонија и економски најзначајна за државата, со интернационалните сорти каберне совињон и мерло. Вината од сортата вранец (2008) беа најбогати со пигменти, фенолни киселини, стилбени и флавоноли, кои значително допринесуваат за стабилизација на бојата, што е особена карактеристика на оваа сорта. Освен тоа, вината беа произведени во различни години на берба со цел да се провери дали и како се менуваат антиоксидантите во вината во текот на зреењето. Од што зависи антиоксидантната активност на виното? Антиоксидантната активност зависи од повеќе компоненти присутни во виното. Тоа се главно полифенолите, а меѓу нив флавоноидите (флвоноли, флаван-3-оли и антоцијани) и нефлавоноидите (фенолни киселини, стилбени) се соединенијата кои делуваат како антиоксиданти преку механизам на отстранување на слободните радикали кои ги напаѓаат клетките. Стилбените, меѓу кои најзначаен е ресвератрол-3-глукозид (познат како пицеид) се доста проучувана група на соединенија. За активноста на пицеидот се направени бројни истражувања, главно насочени на неговото позитивно влијание врз кардиоваскуларни заболувања кај луѓето. Според тоа, полифенолите се одговорни за антиоксидантните својства на вината и покажуваат различни биолошки активности и потенцијални здравствени ефекти, делувајќи против артериосклероза, коронарни срцеви болести и го инхибираат растот на канцерогените клетки. На што се должат позитивните здравствени ефекти на виното? Консумацијата на вино може да има позитивни, но и негативни ефекти врз здравјето на човекот, зависно од количеството на конзумирано вино и профилот на консументот. Умерената консумација на вино (1-2 чаши дневно) е поврзана со намален ризик од кардиоваскуларни болести, подобри когнитивни функции и намалена смртност меѓу лица од средна и подоцнежна возраст. Полифенолите се главните компоненти кои го определуваат квалитетот на виното, и според тоа, тие се главните соединенија кои имаат позитивни ефекти врз здравјето на човекот. Црвените вина имаа повисока антиоксидантна активност во однос на белите вина бидејќи содржат значително повеќе биоактивни полифеноли. Какви се македонските вина во споредба со оние од други региони во светот и колку антиоксидантните својства на македонските вина се познати во научната сфера во светски рамки? Генерално, нашите вина се карактеризираат со висока содржина на полифеноли, вклучувајќи антоцијани, флаван-3-оли (танини), фенолни киселини и стилбени што ги прави силно обоени и стабилни, поседувајќи карактеристики на висококвалитетни вина. Тоа се должи на поволните климатски услови (температура, врнежи, плодна почва), кои комбинирани со современи технолошки постапки за производство, доведуваат до производство на квалитетни вина. Високата фенолна содржина значи и висока антиоксидантна активност. Во ова истражување сите вина покажаа висока антиоксидантна активност, дури и повисока од вина произведени во Шпанија. Исто така, беше забележана и значително висока содржина на стилбени споредено со светски вина, со што се потврдуваат позитивните ефекти на црвените вина. Резултатите од истражувањето се достапни на следниве линкови: http://www.sciencedirect.com/science/article/pii/S0889157515000356 http://eprints.ugd.edu.mk/12887/1/Ivanova-Petropulos%20et%20al.-Phenolics%20and%20AOA%20Macedonian%20red%20wines-JFCA_2015%2841%29.pdf