Легализацијата тапка во место, на едно евро се спушти цената за „дивите“ тераси

Добивај вести на Viber

Ако досега надоместокот за легализација на тераси во Скопје чинеше над сто евра , цената од 1 евро за квадрат ќе важи и за терасите во станбени згради, но и за тераси пренаменети во станбен простор. Ваквите измени во Законот за постапување со бесправно изградени објекти беа усвоени од Влада на последната седница, информираше денеска министерот за транспорт и врски Миле Јанакиески.

Со новите измени 60 проценти од приходот од надоместокот за легализација ќе го добива Град Скопје, а 40 проценти ќе бидат за општините каде е изграден дивиот објект. „Градот Скопје има обврска да ги користи овие средства наменски за донесување планска документација со која се врши вклопување на бесправните објекти и за инфраструктурно уредување на просторот за потребите на овие објекти како и да достави извештај за користењето на средствата. Во спротивно се предвидува глоба за одговорното лице во Градот “, изјави денеска министерот Јанакиески. Тој потсети и дека рокот поднесувањето на документите за легализација на дивоградбите е до 10-ти јуни идната година. Според градоначалникот на Скопје, Коце Трајановски, ова е добра мерка за граѓаните. „Со измените ќе им се овозможи на поголем број граѓани кои имаат тераси да ги легализираат. Барањето за измени на Законот за постапување по бесправно изградени објекти, е на барање на граѓаните кои имаат балкони и тераси во станбените објекти“ изјави Коце Трајановски, градоначалник на град Скопје. Од вкупно 350 илјади дивоградби, досега се легализирани само 50 илјади, покажуваат последните податоци. За останатите се чека дополнување на документацијата и вадење елаборати, појаснуваат од ресорното министерство.