Легалноста на македонските авио-субвенции сепак ќе се проверува во Брисел

Добивај вести на Viber

Европските институции, по поплаката од Косово, ќе проверат дали субвенциите што ги дава Македонија во авиосообраќајот се косат со европските прописи, јави агенцијата Мета. „Комисијата е запознаена со финансиската помош на Поранешната Југословенска Република Македонија за авиопревозниците. Комисијата побара од надлежните национални власти да обезбедат соодветни информации и докази за да се испита дали оваа шема е во согласност во соодветните одредби од договорот на Европската заедничка воздухопловна област“, стои во реакцијата на Европската комисија. Тужбата дека Македонија ги прекршува европските прописи стигна од Косово, кое се жали дека земјава ја нарушува конкуренцијата во авиосообраќајот спротивно на европските прописи. Од ресорното Министерство за транспорт и врски во Македонија велат дека целата постапка за доделување на финансиска поддршка на домашни и странски авиопревозници била внимателно анализирана пред да биде спроведена и дополнуваат дека истата е во согласност со европското законодавство. „Министерството за транспорт и врски, на барање на Министерството за инфраструкура на Косово уште во 2012 година испрати допис во кој се образложени меѓународните правни норми врз основа на кој се спроведува проектот за доделување на финансиска поддршка за авиопревозници, од каде е јасно дека не е прекршено европското законодавство“, велат од ресорното Министерство. Дополнително, оттаму потенцираат дека и во наредниот период ќе продолжат со имплементирање на проектот за финансиска поддршка на авиокомпании со цел зголемување на бројот на директни летови до европските дестинации и овозможување на попристапни цени за патниците во Македонија. ЕВТИНИТЕ ЛЕТОВИ ГО НАЛУТИЈА КОСОВО: Што доби Виз-Ер од македонската Влада?