Лекарската комора бара заштита за здравствените работници
Објавено во: Македонија 07 Септември, 2019
Лекарската комора бара од институциите да ги заштитат здравствените работници.
„Не само полициска заштита. Ги замолуваме нашите пациенти конечно навистина да го погледаат законот за нивните права и да видат дека имаат и обврска да го почитуваат оној што му пружа помош. Докторите се со закон прогласени за службени лица, но кога ќе бидат натепани или застрелани не помага многу. Соработниците на докторите не се службени лица. Луѓето кои се грижат за здравјето на другите заслужуваат почит“, велат од Лекарската комора.
Од таму бараат од институциите и од пациентите да им овозможат на сите здравствени работници да ја извршуваат својата работа без страв за сопствениот живот.
Во Тетово беше нападнат и претепан лекар, а напад имаше и на медицинска сестра во Драчево.Од МВР соопштија дека е поднесена пријава против А.Б.(43) од тетовска Голема Речица и неговиот брат Л.Б.(40 ) од Тетово, поради основи на сомнение дека сториле кривично дело „насилство“.
Тие се сомничат дека вчера околу 9 часот и 30 минути, на Одделението за кожни болести во тетовската клиничка болница, физички го нападнале лекарот А.Е.( 45 ).
Во поликлиниката Драчево синоќа 41-годишниот Ј.Г. физички ја нападнал медицинската сестра М.Л. (60). Против Ј.Г., според МВР, по документирање на случајот ќе биде поднесен соодветен поднесок.