Левица поднесе резолуција во Собранието за „репресивните ковид мерки“

Добивај вести на Viber

Пратениците на Левица, Димитар Апасиев и Борислав Крмов, во Собранието поднесоа Предлог-резолуција за „правните и моралните аспекти на Ковид-вакцинацијата„, односно против, како што велат од таму, репресивните мерки кои ги наметнува власта над невакцинираните граѓани.

Од таму додаваат дека резолуцијата е заснована на неколку правни акти донесени во Советот на Европа и дека констатира постоење низа проблеми на терен во врска со вакциналната имунизација на населението. Од Левица сметаат дека противречните и контрапродуктивни мерки од ден на ден стануваат сè порестриктивни, порепресивни, непропорционални и дискриминирачки за македонските граѓани.

Во Резолуцијата се укажува дека вакцинацијата против новиот коронавирус SARS-CoV-2 не е и не смее да биде задолжителна и дека граѓаните мора да бидат информирани дека никој не смее да им врши политички, правен, социјален, економски или друг вид притисок да се вакцинираат, доколку некој не сака да го стори тоа на доброволна основа и по слободна волја;

„Користењето т.н. зелени (ковид) пасоши, односно „сертификати за вакцинација“ ќе се користат само за нивната првично назначена цел од страна на Светската здравствена оргнизација, т.е. за обезбедување надзор над долгорочните ефекти на вакцините и нивната безбедност по здравјето на луѓето, за следење на ефикасноста на вакцината врз имунолошкиот систем на пациентите, како и за мониторирање на потенцијалните нус-појави и несакани ефекти од вакцината“, пишува во една од точките.

Од „Левица“ очекуваат резолуцијата упатена до извршната власт да се донесе пред почетокот на изборната кампања за претстојните Локални избори.