Лидија Димова: Премиерот има интерес за отворање нов универзитет, а другите се разбираат само во финансии
Објавено во: Македонија 05 Октомври, 2022
Поранешната пратеничка Лидија Димова, инаку обвинета дека како директорка на Национална агенција за европски образовни програми и мобилност, заедно со уште две лица злоупотребила 320.000 евра пари од европски фондови, го искритикува составот на новоформираниот Совет за унапредување на образованието и науката.
Со работата на Советот ќе претседава премиерот Димитар Ковачевски, а во состав ќе бидат министерот за образование и наука Јетон Шаќири, првиот вицепремиер Артан Груби, вицепремиерот за економски прашања Фатмир Битиќи и министерот за финансии Фатмир Бесими.
Димова за Ковачевски напиша дека преку ова тело има интерес за отворање на нов приватен универзитет во земјата, додека останатите членови се разбирале само „во финансии“.
„Од составот на ова тело се гледа дека Советов е осуден на пропаст. Премиерот има интерес за отворање нов универзитет (барем јас кога бев некој фактор ми беше кажано), а другите се занимаваат само со финансии. Каде е СЕП? Да не ја споменувам ни Националната агенција за европски образовни програми и мобилност... Или, ова нема да биде дел од евроинтерациите на нашата држава... ЕУ има милион образовни стратегии што мора да ги следиме!“, напиша поранешната пратеничка која до лани ја водеше Национална агенција за европски образовни програми и мобилност
На предлог на Министерството за образование и наука, Владата ја усвои информацијата за потребата од формирање на Советот, преку кој ќе се овозможи подобрување на квалитетот на образованието и науката, оптимизација во образованието, зајакнување на системите на евалуација и оценување, реформирање на наставните програми со нивна поголема насоченост кон резултатите од учење, подобра ориентираноста на програмите за стручно образование и обука кон потребите на пазарот на трудот, како и програмите во високото образование да ги отсликуваат потребите на пазарот на трудот.