Македонија и Катар договараат редовна авиолинија

Добивај вести на Viber

Воспоставување на редовна авионска линија час поскоро на релација Скопје-Доха е причината поради која за февруари е закажана средба помеѓу претставници на Kатарската национална авиокомпанија Qatar Airways и директорот на Агенцијата за цивилно воздухопловство, Дејан Мојсовски, дознава Фактор. Детали за можната нова директна линија до Доха сè уште нема. Воведувањето на редовната линија е во насока на зајакнување на економската соработка, како и потребата од создавање и одржување поволни услови за инвестиции. Македонија воопшто не е непозната за Qatar Airways ако се земе предвид дека во последните четири години компанијата интензивно регрутира македонци кои во Доха веќе работат како стјуарди и стјуардеси. Но, додека Македонските власти цела година се обидуваат да ја воспостават редовната линија меѓу Скопје и Доха, тоа веќе го направија властите во Хрватска и Србија. Емирот од Катар, шеикот Хамад бин Калифа Ал Тани, кој Македонија ја посети во октомври минатата година си замина со најава за интензивирање на соработката во авиосообраќајот. Тој најави и можна соработка со Македонија во градежништвото, земјоделството, туризмот и во енергетиката. Но, за конкретна инвестиција се уште не станува ниту збор.