Македонија упатила вербални ноти за знаците до Грција
Објавено во: Македонија 29 Февруари, 2020
Македонија до Грција испратила неколку вербални ноти за непочитување на Преспанскиот договор во делот на сообраќајните знаци.
Ова го потврди лидерот на СДСМ Зоран Заев на ТВ дуелот со неговиот опонент од ВМРО-ДПМНЕ, Христијан Мицкоски.
Тој покрај тоа изјави дека се испратени и други вербални ноти за одредени други ставови од Договорот, без при тоа да ги посочи кои.
Ова Заев го одговори реплицирајќи на реакцијата на Мицкоски дека власта брзо реагирала со разрешување на техничката министерка за труд и социјална политика Рашела Мизрахи за неупотреба на новото уставно име на државата без при тоа да ги истакне своите забелешки до другата страна.
Заев истакна дека до сега неколку пати реагирале и испратиле вербални ноти до Грција.
„Имаме вербални ноти за знаците, има дел од знаците веќе променето во Грција, имаме вербални ноти за имплементацијата за други ставови и секој пат од двете страни реагираме. Постои меѓународна група составена од двете земји која преговараат за трејд марковите, денеска се знае кога се менува пасошот, кога се отвораат поглавјата“ изјави Заев.