Добивај вести на Viber
Повик за набавка на гарнитури за превоз на патници во железничкиот сообраќај, објави Министерството за транспорт и врски. Набавени ќе бидат четири дизел патнички гарнитури и шест патнички гарнитури на електричен погон во вредност од 25 милиони евра.
Како што информира министерот Миле Јанакиески, со новите гарнитури ќе може да се превезуваат вкупно 1.200 патници, бидејќи капацитетот на секоја од нив е 200 патници.
Тој истакна дека новите патнички гарнитури ќе бидат употребени на најфреквентните линии и ќе покријат 60% од линиите во железничкиот сообраќај, со што на патниците ќе им биде овозможен поудобен и поквалитетен превоз.
- Патничките гарнитури ќе бидат по највисоки европски стандарди. Истите ќе бидат целосно климатизирани, со вакуум тоалети, ќе бидат енергетски ефикасни, а ќе можат да ги користат и лица со ограничена мобилност - нагласи Јанакиески.
Обновата нема да значи автоматско зголемување на цените на билетите, а возовите ќе се движат со зголемена брзина од 100 до 120 км/ч.
Јанакиески очекува договорот со избраната компанија да биде потпишан во декември, а најдоцна до почетокот на идната година, по што во рок од 12 месеци ќе пристигнат првите гарнитури кои сите наеднаш ќе бидат пуштени во сообраќај.