Македонија ќе ја слушне осмата условна препорака од Брисел

Добивај вести на Viber

Македонија во исчекување на извештајот за напредок на земјата.

Очекувањата се дека од Брисел до Македонија ќе стигне уште една условна препорака за отворање на преговорите за членство во ЕУ.

Иако во Брисел сметаат дека земјите сè уште не се доволно зрели за да станат членки на европското семејство, сепак оценуваат дека нивното интегрирање ќе им помогне и на земјите и на ЕУ, која исто така ќе има придобивка од нив, особено кога станува збор за стабилноста и за економските пазари. Сепак, се очекува во документот да се истакне дека балканските влади ќе мора да испорачаат одржливи резултати и да ги трансформираат нивните општества.

Од Европската комисија одбиваат официјално да коментираат каква ќе биде содржината на предлог-извештајот за оваа година за Македонија, но и за сите останати земји од процесот на проширувањето.

За Македонија, се очекува да се поздрават големиот број на реформи што го приближуваат македонското до европското законодавство, но и да се забележи назадување во однос на владеењето на правото и медиумската состојба во земјата. Комисијата во овој извештај се очекува и официјално да побара продолжување на рокот за поднесување на обвиненија на Јавното обвинителство за гонење на кривични дела поврзани и кои произлегуваат од содржината на незаконското следење на комуникациите (СЈО) и итно имлпементирање на препораките од бриселскиот експерт Рајнхард Прибе.