Македонија кон ЕУ и НАТО: Ние направивме силен напор, сега вие сте на ред
Објавено во: Македонија 23 Октомври, 2017
Македонија направи многу напори на патот на евроатлантските интеграции, сега е ред на конкретни чекори од страна на ЕУ и НАТО.
Ова го изјави македонскиот вицепремиер задолжен за европски прашања, Бујар Османи, на работна средба со францускиот евроминистер Натали Лоазо за време на работната посета во Париз.
Тие разговараа за процесот на евроатлантската интеграција на Македонија, како и за билатералната соработка. Османи го посочи укинувањето на бројните политички пречки, кои стоеја пред Македонија на патот на евроатлантските интеграции.
Тој даде пример за позитивни чекори како Договорот за добрососедство со Бугарија, новиот проект на закон за јазиците, како и мерките за градење доверба со Грција.
Тој изрази задоволство од досегашната поддршка од Франција за интеграција на Македонија во ЕУ и НАТО, како и позитивната улога на Париз во стабилизирањето на земјите од Западен Балкан.
„Согласно успешното исполнување на обврските од страна на Македонија, очекувам и конкретни чекори од страна на ЕУ и НАТО, кои би биле во насока на зајакнување на европската перспектива на нашата земја“, рекол Османи.
Тој ги повтори амбициите на Владата за добивање на датум за почеток на преговорите за членство во европската заедница до крајот на 2018 година.