Maкедонија се соочи со пад на БДП каков немало од воената 2001, Заев сепак е оптимист

Добивај вести на Viber

Oгромен пад регистрира македонскиот Бруто домашeн производ. 

Статистика објави дека стапка на раст од минус 12,7 отсто, е пад кој не е забележан од 2001 година, кога земјата се соочи со воен конфликт. 

Премиерот Зоран Заев е оптимист.  Вели дека нашата економија 60 проценти е поврзана со европската економија и голем дел од работите не зависат само од нас. Како пример посочи дека и германската економија има голем пад. 

Според Заев, БДП е во согласност со проекциите, а параметрите покажуваат дека добро се справуваме со економските состојби. 

„Но, во вториот квартал имаме и раст во неколку гранки како што е земјоделството и неколку други што покажува дека домашниот перформас е добар во вториот квартал и верувам дека ќе се задржиме на севкупниот пад на БДП да биде еден од најслабо погодените во регионот со намалување не повеќе од минус четири проценти во вкупниот раст“, изјави Заев.

Извозот на стоки и на услуги се намалил за 32 отсто, а увозот на стоки и на услуги има намалување во номинален износ од 30,2 отсто.

Во првиот квартал, пред да почне кризата со коронавирусот во март, БДП имаше раст раст од 0,2 отсто.

Од податоците на статистичарите може да се види дека најголем пад има кај рударството, преработувачката индустрија, но значаен пад има и кај трговијата.