Македонските тинк-тенк организации меѓу најтранспарентните во светот

Добивај вести на Viber

Македонија, Грузија и Црна Гора имаат најтранспарентни тинк-тенк организации (невладини организации кои се занимаваат со истражување и креирање политики) во целиот свет, покажа истражувањето на Транспарифај. Со истражувањето се опфатени 169 вакви организации во 47 земји во светот. Само 35 вакви организации транспарентно објавиле кој ги финансира нивните активности. Транспарифај го прави првиот глобален рејтинг за финансиска транспарентност на најважните тинк-тенк организации. Овој проект доделува ѕвездички за транспарентност - така што најотворените организации добиваат пет, а најзатворените нула ѕвездички. Се оценува колку организациите преку нивните вебстраници јавно ги откриваат изворите на нивно финансирање. Македонија е трета на оваа листа. Во земјава биле анализирани вкупно 8 тинк-тенк организации, од кои една има пет ѕвездички (невладината Реактор - Истражување за акција), една има 4 (Центар за истражување и креирање политики), една - 3 ѕвездички, четири организации имаат рејтинг 2, додека една добила една ѕвездичка. Од 169 тинк-тенк организации, само 21 заслужиле пет ѕвездички, а исто толку добиле и нула. Најголем број - дури 70 организации имаат две ѕвездички, кои означуваат ниско ниво на транспарентност. Меѓу најнетранспарентните со рејтинг од нула ѕвездички е и американската Фондација Отворено Општество на Џорџ Сорос. Б.А.