Добивај вести на Viber
Во јавноста се уште не е познат моделот на стопанисување со овие објекти. Министерството за економија веќе избра фирма од Тетово која за 121.500 евра ќе понуди идејно архитектонско ентериерно решение на комплексот кај Пантелејмон.
Иако проeктот „Македонско село“ првично требаше да биде готов до октомври 2012 година, подоцна доби пролонгирање до пролетните месеци во 2013 година, за сега да добие ново одложување. Министерот за економија
Валон Сарачини за Фактор обелоденува дека 17-те куќи, кои се очекува да бидат уникатно етнолошко, културолошко и туристичко претставување на Македонија за неколку месеци ќе бидат во функција.
“Проектот ќе биде готов во јуни оваа година. Комплексот ќе има 17 објекти, од кои 12 куќи што ќе ја рефлектираат културата на сите региони во Македонија“, изјави Сарачини.
Според проектот, куќите ќе бидат со стилски карактеристики од Беровско-малешевскиот крај, делчевскиот, кратовскиот, галичкиот, полошкиот, прилепскиот и скопскиот регион.
![Etno selo Nerezi 0101](http://faktor.mk/wp-content/uploads/2013/02/Etno-selo-Nerezi-0101-564x423.jpg)
Во рамките на комплексот е предвиден и Музеј во кој ќе биде изложено дел од етнолошкото наследство на Македонија, како и амфитеатар, традиционален ан, воденица, валалница, трло, штала и рибник, сите во стар традиционален стил. Во јавноста се уште не е познат моделот на стопанисување со овие објекти. Од Владата неодамна изјавија дека се уште размислуваат како ќе се стопанисува со меаната, работилниците, објектите. Дури и најавија дека најверојатно ќе дозволат на горните катови од куќите да се направат апартмани во кои туристите ќе можат да престојуваат, но се уште нема одлука под кои услови тоа ќе може да се прави.
Избран е и ентериерот на „Македонско село“
Министерството за економија веќе избра каков ќе биде ентериерот на куќите. За 121.500 евра Друштвото за проектирање градежништво трговија и услуги Структуре ДООЕЛ експорт импорт од Тетово веќе изработува основен и изведбен проект за идејното архитектонско ентериерно решение на комплексот „Македонско село”.
Според информациите кои се достапни на Бирото за јавни набавки, Министерството за економија и Структуре ДООЕЛ се договориле со преговарање без објавување на оглас бидејќи истата фирма победи на Конкурсот за избор на архитектонско ентериерно решение за комплексот. Во конкуренција на уште четири други автори, ДПГТУ Структуре ДООЕЛ експорт импорт од Тетово победи на конкурсот за што од Министерството за економија доби награда од 400.000 денари (6.500 евра).
![etno_selo4](http://faktor.mk/wp-content/uploads/2013/02/etno_selo4.jpg)
„Македонско село“ се очекува да биде туристичка атракција не само за домашните, туку и за странските туристи. Основната идеја на проектот е да се претстави традиционалното македонско село, начинот на живот, културата, традиционалната архитектура, историјата на занаети, спецификите на објектите карактеристични за сите етнички заедници во Македонија. Комплексот почна да се гради во јуни 2011 година.
Катерина Попоска
Фото Билд.мк