Макпетрол продолжува со откупот на сопствени акции
Објавено во: Финансии 20 Февруари, 2018
Макпетрол продолжува со трендот на откупување на сопствени акции и оваа година, па така изврши нова трансакција со која презеде 24 сопствени акции и го зголеми учеството во бројот на обични акции со право на глас.
„Согласно член 34 алинеја 4 од Правилата за котација на Македонската берза АД
Скопје, известуваме дека Макпетрол АД Скопје се стекна со 24 сопствени акции и
сега поседува 3.771 сопствени акции што претставува 3,36% од вкупниот број на
акции на издавачот Макпетрол АД Скопје“ известија од нафтената компанија преку Македонска берза.
Акцијата на Макпетрол и натаму е една од највредните на Македонска берза ако се гледа поединечно. Според последните податоци остварени на вчерашното отворено тргување постигната е цена од 29,500 денари. Ако оваа вредност ја пресметаме со последното преземање на сопствени акции доаѓаме до бројка од околу 700 илјади денари или околу 11 илјади евра кои Макпетрол ги вложи за поголема ликвидност на парични средства.
Во текот на овој месец Макпетрол АД Скопје исто така откупи 183 сопствени акции. Акции од Макпетрол преземаа и претседателот на управниот одбор, Андреја Јосифовски, како и Саша Лекиќ исто така еден од директорите на компанијата.