МАТЕМАТИЧАР, ДОБРО ЗБОРУВА АНГЛИСКИ, А СЕ СЛУЖИ И СО РУСКИ И БУГАРСКИ - која е Славица Грковска, ја паметат и како многу ревносен пратеник

Добивај вести на Viber

Вечерва ќе се знае дефинитивно дали поранешната пратеничка Славица Грковска, ќе стане новиот вицепремиер во Владата на Димитар Ковачевски за борба против корупцијата, место кое сега го држи Љупчо Николовски. 

Оваа функција беше воспоставена по парламентарните избори во 2020 година.

Дел од медиумите веќе објавија дека поранешната пратеничка на СДСМ, Славица Грковска ќе биде новата вицепремиерка за борба против корупцијата. СДСМ за вечер го свика Централниот одбор, на кој треба да биде дефиниран списокот со членови на новата влада, а потоа да биде испратен во Собранието.

Медиумите ја паметат Славица Грковска од времето на нејзиниот пратенички мандат од редовите на СДСМ. Таа важеше за доста одговорен, сериозен и ревносен народен избраник. 

Што стои во биографијата на Славица Грковска. 

Таа е родена на 27 јули 1970 година во Скопје и е Македонка. Дипломирала на Природно математички факултет во Скопје. Магистер е по математички науки. Помлад асистент по математика на Институтот за математика при Природно-математички факултет. Добро зборува англиски, се служи со руски и бугарски јазик. Живее во Скопје.

За време на нејзиниот пратенички мандат имала и значајни собраниски активности. 

Во Постојаната анкетна комисија за заштита на слободите и правата на граѓанинот, била заменик претседател, потоа член на Комисија за европски прашања, член на Комисија за образование, наука и спорт, заменик претседател на Делегацијата на Собранието во парламентарниот комитет за стабилизација и асоцијација, претседател на Пратеничка група на Собранието за соработка со Парламентот на Француската Република, член на Пратеничка група на Собранието за соработка со Парламентот на Израел, како и координатор на Клубот на пратенички, од март до септември 2010 година.

Од новинарските текстови кои можат да се најдат за Славица Грковска, може да се прочита дека таа од нејзините колеги била посочена како една од најревносниоте пратенички. Таа не само што ги читала речиси сите закони, туку и секогаш доаѓала подготвени за седница, а и често барала компаративни анализи со други држави за слични закони.

Фото: Фејсбук

Н.Н.Ф.