„Медена земја“ не успеа да добие Оскар, Македонците горди на својот филм
Објавено во: Македонија 10 Февруари, 2020
„Медена земја“ за жал, не успеа да се запише во историјата на Оскарите.
Ремек-делото со Атиџе Муратова, на режисерите Тамара Котевска и Љубомир Стефанов, по многуте награди кои ги освои на фестивалите ширум светот, за жал остана без најпрестижната филмска награда, на 92-то издание на Оскар.
„Медена земја“ не доби Оскар ниту во категоријата „Најдобар интернационален филм“, откако претходно изгуби и во категоријата „Најдобар документарец“.
Престижната награда за најдобар интернационален филм ја доби „Паразит“ од Јужна Кореја, кој исто така доби нгради за најдобар режисер и за најдобро оригинално сценарио.
Филмот „Паразит“ всушност ја доби и најпрестижната награда, и тоа е прв пат оваа награда да ја добие филм од неанглиско говорно подрачје.
Признанието за кое најмногу се надевавме замина во рацете на креаторите на „Американска фабрика“, филм поддржан од поранешниот американски претседател Барак Обама.
Сепак, неспорен е впечатокот во јавноста дека „Медена земја“ испиша нова историја во македонската кинематографија, а и во оскаровската, бидејќи никогаш досега документарен филм не бил номиниран и во категоријата Најдобар интернационален филм. „Медена земја“ претходно се закити со голем број значајни награди и критики од многу релевантни личности, што ги направи горди македонските граѓани.
Откако не успеавме да триумфираме ниту во една од двете категории, креаторите на приказната со Атиџе Муратова се огласија на официјалната фејсбук-страна на Honeyland. Нивната изјава Женски Магазин ја пренесува во целост. „Пред сѐ, сакаме да се заблагодариме на сите што нѐ бодреа и веруваа во нас. Сепак, и покрај тоа што „Медена земја“ не доби Оскар, сосема сме свесни за големината на овој филм, за значењето на пораката што ја пренесува, за силата на бескрајните приказни што се кријат во оваа земја и за многуте наши талентирани уметници кои знаат како тие приказни да ѝ ги покажат на публиката. Почестени сме што бевме номинирани покрај овие одлични филмаџии со смели приказни кои им се обраќаат на луѓето од целиот свет, на универзалниот јазик на кинематографијата. Не можеше да се предвиди дека нашиот филм ќе влезе во историјата на Македонија и во историјата на номинациите за „Оскар“. „Медена земја“ истовремено беше номиниран во две категории, за најдобар документарен и за најдобар интернационален филм, затоа што универзалноста на приказната и јазикот на филмот ја даваат неговата компетентност и сила да се натпреварува со останатите номинирани. Кога го промовиравме филмот на фестивалот „Санданс“, пред повеќе од една година, не се ни надевавме дека ќе стигнеме толку далеку. Им се заблагодаруваме на сите што веруваа во нашиот мал филм и нè поддржуваа, а особено му се заблагодаруваме на дистрибутерот „Неон“ за вербата во моќта на кинематографијата и во смелото раскажување приказни. На крај, би сакале да ѝ се заблагодариме на нашата водечка ѕвезда, Атиџе Муртова што ни дозволи да влеземе во нејзиниот прекрасен свет. Филозофијата на Атиџе ‒ земи половина, остави половина ‒ е едноставна, но длабока. Тоа е порака во којашто може да се пронајде секоја публика. Горди сме што сме гласниците на таа порака.“ И главната протагонистка на документарецот, Атиџе Муртова, од Лос Анџелес ја упатува својата порака: Инаку, престижната награда за најдобар актер ја доби Жоакин Феникс, за „Џокер“, а Рене Зелвегер се закити со наградата за најдобра актерка за „Џуди“. Популарниот Бред Пит зеде Оскар за најдобар актер во споредна улога.
- Мојот живот по снимањето на филмот драстично се промени. Сега имам нова куќа, и сѐ станува подобро и подобро. Сакам публиката да извлече само една порака од филмот: како што јас споделувам со своите пчели, така сакам и сите луѓе да споделуваат едни со други.