Медиумите ќе објават војна на новата давачка за емитување музика!

Добивај вести на Viber

Во Битола избран Управниот одбор на Здружението на  приватните медиуми во Македонија ЗПММ во кој членуваат членови од скоро сите региони во државава. Во текот на следнава недела, преставниците на ова здружение ќе се обидат да остварат средба со министерка за култура, под чиј ресор е издавањето на лиценцата на здружението ММИ кои ќе врши наплата на сродните колективни авторски права. Освен ова, ЗПММ сака да се сретне и со челните луѓе од  Советот на радиодифузија за да ги запознае со проблемите со кои се соочуваат во оваа тешката економска состојба пред која се исправени. Првиот председател на ЗПММ, воедно главен и одговорен уредник на  Супер радио Сашо Митаноски од Охрид изјави: Она што сите заедно мора да го направиме е да го кренеме гласот против неоправданите трошоци кои во последно време им се наметнати на медиумите. Пред нас се големи предизвици кои ќе се обидеме заедно да ги надминеме. Како штo ФАКТОР веќе напиша во тек е подготовка на закон со кој заслушање на музика по нова година во Македонија ќе плаќаат сите, од радиостаници, до семкарници, хотели, кафулиња, продавници… Се размислува во оваа давачка да бидат вклучени дури и објектите на МПЦ, бидејќи и кај нив се слуша музика. Здружението на произведувачите на фонограми и уметниците музички изведувачи ММИ (Македонска Музичка индустрија), ја доби лиценцата од Министерството за култура за колективно управување на сродните права на произведувачите на фонограми и на уметниците музички изведувачи, во согласност со Законот за авторското право и сроднитe права. Здружението наскоро ќе започне со прибирање на парични надоместоци од сите корисници кои јавно пуштаат музика во РМ, а со цел правилна распределба и надокнада за искористувањето на музиката во делот кој им припаѓа на фонограмските продуценти и музичките изведувачи. Се очекува законот да биде заокружен најдоцна до Нова година, по што тие дури и без потпишани договори, ќе може да започат со наплата. Како корисници се јавуваат различни категории од медиуми, до угостителски објекти, козметички салони, па дури и мали продавници и семкарници. Секаде каде музиката ќе се слуша јавно, ќе постои обрска за наплата на оваа давачка. Здружението на приватните медиуми ќе биде исправено пред силен предизвик, како да се бори против новите законски решенија.