„МЕПСО“ донира 150.000 евра за електрификација на три села во општина Конче

Добивај вести на Viber

Радовишките села Долни Радеш, Дона Враштица и Горна Враштица се електрифицираа и добија напојување со електрична енергија. Изградбата на далноводот и електроенергетската мрежа е инвестиција во вредност од 9,2 милиони денари (околу 150.000 евра) и средствата се обезбедени со донација од Македонскиот електропреносен систем-оператор А.Д. МЕПСО.

Македонскиот електропреносен систем-оператор „А.Д. МЕПСО“ М-р Синиша Спасов, генералниот директор на „А.Д. МЕПСО“ и Благој Јованов, градоначалникот на општина Конче денеска со симболично вклучување на далекуводот го означија почетокот на електрификацијата на трите села во општина Конче, во близина на Радовиш.

Оваа донација е обезбедена во рамки на платформата за општествено одговорни политики на „А.Д. МЕПСО“ со која се електрифицирани три села во општина Конче, кои се близина на мантовското езеро.

- Горди сме што можеме преку политиката за општествена одговорност на „А.Д.МЕПСО“ да дадеме помош и поддршка таму каде што е повеќе од потребна. Да создадеме позитивни и корисни практики и да дадеме пример, да ја вратиме подзаборавената вредност – да се помага. Верувам дека во иднина кога ќе дојдеме на ова место ќе најдеме поголема благосостојба, посилна локална економија: сточарство, селски туризам. Дозволете ми во оваа пригода да се заблагодарам на Владата на Р.М. која беше иницијатор за реализација на овој проект со кој се овозможува македонските села да го вратат своето значење во националната економија и во општествениот живот воопшто, изјави м-р Синиша Спасов, генерален директор на „А.Д.МЕПСО“.

Донацијата беше одобрена, од менаџментот на „А.Д. МЕПСО“ по препорака на Владата, со цел преку електрификацијата да се подобрат условите за живот, за развој на земјоделството, сточарството и на селскиот и на езерскиот туризам на бреговите на вештачкото езеро „Мантово“.

Решавањето на инфрастуктурните услови преку електрификација ќе овозможи овој реон да заживее и да се создадат услови за егзистенција и за инвестиции во сточарство и земјоделство.

Изградбата на далновод во должина од 2.754 метри и три трафостаници ќе овозможи развој на овој дел од општината и  зголемување на интересот за враќање на голем дел мигрирани семејства од соседните општини кои располагаат со сопствен имот и објекти на територијата од истите населени места.

Големи придобивки се можноста за рурален туризам и за развој на  туристичката езерска населба ,,Мантово“. „Дозволете да изразам голема благодарност до Владата и до „МЕПСО“ за драгоцената поддршка за развој на нашата општина“,потенцираше Благој Јованов, градоначалник на општина Конче.

Договорот за донација помеѓу А.Д. МЕПСО и општина Конче беше склучен во септември 2011 година, а реализацијата на проектот и приклучувањето на дистрибутивната мрежа на „ЕВН“ е завршено во 2013 година.