Мицкоски се сретна со Радев, побара трајно решение за спорот

Добивај вести на Viber

Премиерот Христијан Мицкоски се сретна со бугарскиот претседател Румен Радев на Самитот на Европската политичка заедница во палатата Бленхајм во Оксфорд.

„Румен Радев, во разговор со премиерот Христијан Мицкоски, изрази надеж дека Република Северна Македонија ќе го забрза спроведувањето на билатералниот договор за пријателство, добрососедство и соработка со Бугарија и договорите на земјата со Европската Унија, кои ќе ја отвори перспективата за почеток на преговори за полноправно членство со ЕУ“, соопштија од кабинетот на бугарскиот претседател.

На билатералните средби во Лондон, премиерот Мицкоски ја истакна потребата од регионална енергетска соработка, „бидејќи сите земји од регионот и Европа мора да најдат алтернатива на рускиот гас и неговата злоупотреба за политичко влијание“.

Тој на средбата со Радев побарал трајно решение на проблемот со Бугарија. Мицкоски минатиот месец изјави дека се додека е на функција нема да се потчини на „бугарскиот диктат“ за уставни измени.

„Главен приоритет на Македонија и на новата Влада на Македонија се добрососедските односи и евентуално изнаоѓање трајно и стабилно решение на проблемот што го имаме со нашиот источен сосед“, нагласи Мицкоски за средбата со Радев.