Мицкоски за Фокус: Јас сум жртва на уцени на Катица Јанева
Објавено во: Македонија 13 Септември, 2019
Јас лично бев жртва на нејзина уцена кога Катица Јанева во нејзината канцеларија ме уценуваше да гласам за СЈО за да ми го одмрзне имотот, вели во интервју за Фокус, лидерот на ВМРО-ДПМНЕ, Христијан Мицкоски. На прашање во врска со објавите на Специјалното јавно обвинителство за предистрагите и за предметите кои почна да ги истражува Мицкоски вели:
Мицкоски: Не може специјалниот јавен обвинител секогаш на пресконференија да излегува и да лицитира со имиња и да нарушува пресумпција на невиност и практично да ги осудува луѓето, а притоа да не ја информира јавноста дали имаме предистрага или истрага… не може во сѐ да има криминал. Мора да постојат докази за некаде каде што нема сторено криминал. Што значи дека се изгуби објективноста. Понатаму, имам сведочења од пратеници коишто практично биле предмет на обработка на Катица Јанева во процесот на уставните измени. Подготвени се да го потврдат тоа секаде. Јас лично бев жртва на нејзина уцена кога Катица Јанева во нејзината канцеларија ме уценуваше да гласам за СЈО за да ми го одмрзне имотот. Тоа е трговија со правото и конечно на крај, сведоци сме на најголемиот скандал во поновата историја на Република Македонија „Рекет“, каде што со очи македонската јавноста можеше да ги види парите во куферот и да ја слушне Катица Јанева дека се ќе било ОК. Зарем вие мислите дека овие, Бојан Јовановски, Катица Јанева и останатите учесници сами можеле ова да го направат?
ФОКУС: Ќе покаже истрагата или не верувате во тоа?
Мицкоски: Јас ви гарантирам ако истрагата е објективна, а до сега гледаме дека е се само не е објективна, бидејќи ако случајот бил пријавен до премиерот од страна на жртвата во месец мај, а ние ги имаме приведувањата во август, па ни требаше Катица Јанева да се врати од сончање од плажите кај нашиот јужен сосед и да ги уништи телефоните, односно форензички да ги избрише, самото тоа реферира дека ние денеска немаме честита и непристрасна истрага. Но, еве, да речеме дека истрагата ќе се води како што треба, тогаш ќе видите дека ниту „Лобутин“ кондурчињата биле за бадијала, ниту, пак, оние спектакли што ги организираше Меѓународниот сојуз. Па, видете има ли поголема потврда од следнава какафонија. Излегува онаа жена, ќе ми простите ѝ го заборавив името, вели дека Силјан Мицевски за идејата ѝ платил 720.000 евра, а Силјан Мицевски пред суд дава изјава за медиумите дека он не ги дава на жената, туку ги префрлил на сојузот.