Милошоски: Дали Богоев беше во ОЈО за „Рекет“ поради “Карпош на вода“?
Објавено во: Македонија 01 Август, 2019
Пратеникот од ВМРО-ДПМНЕ, Антонио Милошоски, тврди дека е можно градоначалникот на Карпош, Стефан Богоев, и Војан Јовановски, првообвинет во случајот „Рекет“, имале заеднички интереси и токму затоа можно е да бил повикан на разговор во обвинителството.
„Градоначалникот на Карпош, Богоев, е еден од 17-те лица кои досега биле во Јавното обвинителство во врска со случајот "Рекет", во кој замешани се Боки 13, најмалку две обвинителки, најмалку 5 вработени лица во СЈО и неколку функционери од власта.
Битни прашања се дали се ова причините зошто Богоев беше во ОЈО за "Рекет":
1. Што содржи меморандумот за соработка потпишан од Боки13 и Богоев во Ноември 2017та?
2. Финансирање на кампањата за локални избори 2017 година?!
3. Планот за измена на ДУП "Карпош на вода", десно од ТВ Телма кон Вардар (кој Боки13 го нарекол поинаку)?!
4. Злоупотреба на службена положба како градоначалник за потребите на 1ТВ?!
5. Кршење на законот за градба за кој Јанакиески лежи во притвор со месеци по барање на ОЈО и СЈО?“, напиша Милошоски претпладнево на својот профил на Фејсбук.
Инаку, Богоев беше повикан во обвинителството да даде исказ еден ден пред градоначалничката на Битола, но ниту од таму ниту пак градоначалникот можеа да откријат повече детали поради истрагата.
„Во интерес на истрагата, обвинителството не е во можност да сподели детали околу содржината на дадените изјави. Паралелно со прибирањето на вербални докази, Основното јавно обвинителство за гонење на организиран криминал и корупција во континуитет дава насоки и наредби за вршење и на други истражни дејствија“, гласеше одговорот од таму.