Минималецот се зголеми, но продуктивноста ќе тапка во место

Добивај вести на Viber

Минималната плата се зголеми на 18.000 денари, но од Teкстилниот кластер велат дека  продуктивноста засега не може да се зголеми.

Маријана Перковска од Текстилниот кластер објаснува дека за да порасне продуктивноста, потребна е нова и автоматизирана опрема, едукација на работниците, а воедно треба да се има в предвид дека во текстилната индустрија работат повозрасни работнички. Таа додава дека само 2 или 3 отсто од фирмите се во чекор со времето и новите технологии, и тоа најчесто се компании од главниот град, но треба да се има во обзир дека Македонија не е само Скопје и Штип, туку има многу фирми во другите градови кои едвај опстануваат.

„Ни требаат фондови, но тоа да бидат фондови за опрема, а не за пари. Треба да се преиспитаат и критериумите за да може тие фондови да бидат подостапни за фирмите. Друга работа е едукацијата на вработените, на пример нам во текстилот ни требаат добри кројачи, моделари, но сето тоа паѓа во вода додека производството не си го добие своето место во општеството. Прво треба да се зголеми продуктивноста, а потоа да се зголемат платите, и тоа е нормален процес, а ние сега имаме обратен процес, кој пак нема да го подигне стандардот на вработените“ , вели Перковска.

Таа објаснува дека на младите им е приоритет да работат во државно, и таа работа за нив е атрактивна, и додава дека во времето на Југославија било поинаку, но тогаш работникот во фабрика земал повисока плата од административниот работник.  Перковска потсети дека до крајот на месецов цените на намирниците се замрзнати, но потоа веројатно ќе има ново поскапување, и тоа ќе удри по џебот на граѓаните.

Лидија Милановска од Здружението на чевлари Куманово вели дека продуктивноста не се зголемува само со добра волја, туку се потребни машини. И таа е со став дека продуктивноста во овие околности не може да порасне. 

„Ние пет години немаме купено машини, тие што ги имаме само ги одржуваме. Многу од работниците се пред пензија, и тие се успорени, а млади и брзи работници немаме и веројатно многу шивални ќе се преполоват“, рече Милановска.

И таа смета дека дел од работниците ќе добијат откази, а некои фирми ќе се затворат, бидејќи и онака не се опоравиле од ударот на падемијата.  Минималната мартовска  плата ќе изнесува 18.000 денари.  Откако власта соопшти дека минималецот се зголемува, беше порачано дека сега треба да порасне и продуктивноста.

foto freepik.com