МИНУС 40 СТЕПЕНИ: Екстремно студено во дел од европските земји
Објавено во: Свет 02 Јануари, 2024
Рекордно ниски температури има во Шведска и Финска, каде се измерени минус 40 степени.
Во селото Никалуокти, населено со домородното лапонско население во северна Шведска, температурата утрово се спушти на минус 41,6 степени, јави шведската јавна телевизија СВТ.
„Тоа е најниската температура измерена досега оваа зима, а времето ќе продолжи да биде прилично студено на север“, изјави метеорологот Нилс Холмквист.
Екстремно студеното време предизвика големи проблеми во железничкиот сообраќај на северот на Шведска. Шведскиот метеоролошки и хидролошки институт соопшти дека на неколку локации во северна Шведска се измерени температури од минус 30 степени.
Во соседна Финска утрово е забележана рекордно ниска температура оваа зима во северозападниот град Јливијеска, минус 37,8 степени. Температури пониски од минус 30 степени се забележани на неколку локации на Арктичката Лапонија.
Финскиот метеоролошки институт издаде предупредување за екстремно студено време оваа недела со прогнозирани температури под минус 40 степени.
Вакви екстремно ниски температури претходно имаше во делови од Русија.