Мирослав Мишковиќ излезе од притвор, во вилата на Дедиње ќе чека судење

Добивај вести на Viber

Сопственикот на „Делта холдинг", Мирослав Мишковиќ, денеска околу 13 часот беше пуштен од затвор со кауција од дури 12 милиони евра. Како што пренесоа српските медиуми, никој од роднините и пријателите не го пречека за време на неговото пуштање од затвор, а возилото веднаш го однесе до вилата во Белград. Судот наведува дека налогот за ослободување на Мишковиќ од притвор е даден по приложувањето доказ дека паричните средства за кауцијата од 12 милиони евра во динари, се депонирани во банка како гаранција дека обвинетиот нема да ја напушти државата. Исто така, Мишковиќ на судот го предаде својот пасош,согласно решение со кое му е изречена мерката на домашен притвор, со обврска да се пријавува во полиција на првиот работен ден од месецот. „Делта холдинг“ соопшти дека „изразува задоволство што по 224 дена во притвор во централниот затвор, претседателот на холдингот, Мирослав Мишковиќ ќе се брани од слобода." „Од моментот на притворувањето пред 7,5 месеци сметавме и сметаме дека не постојат основи за притвор. Секако нам ќе ни треба неговата енергија и визија да ни помогне да продолжиме да ја градиме Делта холдинг како успешна компанија, на задоволство на сите 7000 работници и на целокупната економија на Србија", стои во соопштението од компанијата. Бидејќи Мишковиќ е пуштен од притвор, во овој случај само сопственикот на „Nibens“, Мило Ѓурашковиќ останува во притвор. Синот на Мишковиќ Марко е во домашен притвор од април, додека другите обвинети се пуштени со кауција. По шест месеци од истрагата, обвинителството поднесе обвинение во мај против тројцата осомничени, а осуммина други се осомничени нелегално извлекување и присвојување на средства и имот од повеќе јавни компании за патишта во периодот од 2005 година до  2010. година. Обвинителството се сомнева дека на тој начин го оштетиле јавното претпријатие за патишта за 16, 95 милијарди динари, а српскиот буџет за 472 милиони динари.