ММФ бара од Србија нови мерки за штедење

Добивај вести на Viber

Властите во Србија треба брзо и без одложување да се подготват и да почнат со спроведувањето на новиот план за фискална консолидација годинава и на среден рок. Ова го рече постојаниот претставник на ММФ во Србија, Богдан Лисоволик, кој додава дека освен најавените мерки за штедење потребно е да се намали буџетскиот дефицит за дополнителен еден процент од бруто домашниот производ. Лисоволик во интервју за Блиц вели дека контролата на платите во јавниот сектор и пензиите мора да биде основа на тоа јавните финансии да се стават на одржлива основа. „Дали тоа ќе биде замрзнување или некој друг вид на прилагодување во оваа област зависи од големината на вкупната разлика во финансирањето на јазот, но и од другите мерки што Владата е подготвена да ги преземе", рече тој, истакнувајќи дека е сосема  јасно дека е потребно контрола и намалување на персоналот во јавниот сектор. Тој верува дека зголемувањето на ефективната возраст на пензионирање е клучен приоритет во Србија, истакнувајќи дека изедначувањето на критериумите за мажите и жените е како што вели, најдобра практика во Европа. Тој додава дека ваков модел се спроведува во 24 од 27 земји членки на ЕУ. Како голем проблем ја гледа и невработеноста кај младите која треба да се решава со посебни мерки, а не да се ослободува место за нив само преку испраќање на вработените во пензија. "Што се однесува до евентуалните преговори за нов договор со ММФ, сигурно е дека јасен сигнал за посветеноста за одржлива економска политика на Србија ќе и биде од клучно значење за напредок", рече Лисоволик.