ММФ ПРЕДУПРЕДУВА, СВЕТОТ ТОНЕ ВО ДОЛГОВИ! Долгот ќе го надмине глобалниот БДП до крајот на деценијата!

Добивај вести на Viber

Глобалниот јавен долг би можел да надмине 100 проценти од глобалниот бруто домашен производ до крајот на оваа деценија, што е највисоко ниво на долг од 1948 година, по Втората светска војна, според извештај објавен денес од Меѓународниот монетарен фонд (ММФ).

Во својот последен Фискален монитор, Фондот предупредува дека растечките трошоци за сервисирање на долгот ги оптоваруваат владините буџети, додека трошоците за одбрана растат, а стареењето на населението дополнително го зголемува притисокот врз финансиите.

Постои ризик глобалниот јавен долг да достигне дури 123 проценти од глобалниот бруто домашен производ до 2029 година, забележува ММФ.

Во извештајот се наведува дека периодот на евтино задолжување, кој траеше помеѓу глобалната финансиска криза и пандемијата на коронавирусот, е завршен, а трошоците за сервисирање на долгот веќе ги оптоваруваат буџетите, објавува Блумберг.

- Каматните стапки значително се зголемија на глобалните пазари, а нивната идна траекторија е многу неизвесна - додаваат авторите на Фискалниот монитор.

Фондот, исто така, нагласува дека значителен дел од владините трошоци одат на плати - во просек 25 проценти во развиените економии и 28 проценти во земјите во развој.

Кога јавниот долг е веќе на високо ниво, токму таквите фиксни трошоци го ограничуваат фискалниот простор на владите, бидејќи голем дел од буџетот е веќе врзан за овие ставки.

Оваа недела, министрите за финансии и гувернерите на централните банки се среќаваат во Вашингтон на годишните состаноци на ММФ и Светската банка, каде што, меѓу другото, ќе разговараат за опциите за политика за стимулирање на економскиот раст и напредок во борбата против инфлацијата и растечкиот долг.