ММФ:Богатите Грци мора да си го платат својот дел од данокот

Добивај вести на Viber

Најбогатите слоеви од населението во Грција треба да платат добар дел од обновата на државата, изјави портпаролот на Меѓународниот монетарен фонд (ММФ) Џери Рајс, пренесува АФП. Ова беше изјавено по објавувањето на листата на сметки на 2000 богати Грци коишто парите ги изнеле во Швајцарија, што предизвика вистински скандал во Атина. „Даночната обврска треба да биде распределена праведно и врз најбогатите во грчкото општество, кои треба да си го платат она што го должат", истакна портпаролот во Вашингтон. Објавувањето на листа со грчките богати неплаќачи на данок, предизвика скандал во Атина во време кога земјата е изложена на драстични штедење и зголемување на даноците. Костас Ваксеванис, новинарот кој ја објави листата беше уапсен во неделата и обвинет за кршење на законот поради објавување на лични податоци. „ММФ многупати изјавувал дека е многу важно мерките за штедење да бидат распределени на праведен начин за грчкото население во момент кога тоа вложува огромни напори за враќање на земјата на вистинскиот пат", истакна Рајс. Наместо да се бори против криминалот на даночните измамници, судот се занимава со мене, вели обвинетиот новинар Ваксеванис. Адвокатите  тврдат дека некои од луѓето чии имиња фигурираат на списокот со сопственици на банкарски сметки во Швајцарија, ќе сведочат во корист на новинарот. Спорната листа содржи 2059 имиња на лица за кои се сомнева дека имаат банкарски сметки во швајцарски банки со цел затајување данок. Меѓу објавените имиња има и истакнати членови на грчкиот политички и бизнис врв.