МНР: За да дојдеме до решение ќе биде нужна добра волја и од другата страна
Објавено во: Македонија 30 Јануари, 2018
Од Министерството за надворешни работи велат дека јавното соопштување на крајните позиции го намалува просторот за разговори.
„Од наша страна има добра волја за заемно прифатливо решение кое ќе ги почитува интересите, достоинството и идентитетот на двата народа. За да дојдеме до решение ќе биде нужна добра волја и од другата страна“- велат од МНР.
Грчкиот министер за надворешни работи, Никос Коѕиас синоќа во интервју за грчката државна телевизија ЕРТ најави дека Грција во февруари ќе ѝ достави на Македонија спогодба во четири точки, што според Атина треба да биде основата за решавање на прашањето за името и отворање на патот на Македонија кон НАТО и ЕУ.
Медијаторот Метју Нимиц денеска од Атина порача дека чекањето нема смисла и дека сега е момент да се реши спорот.
Од сите страни стигнуваат охрабрувачки тонови и оптимизам дека сега е време да се реши спорот за името.
Грчките медиуми скоро месец дена шпекулираат со можните имиња.