Москва бара од Берлин да се изјасни по повод тврдењата на Јацењук

Добивај вести на Viber

Русија побарала од Берлин да се изнесе официјален германски став по однос на бизарните тврдења на украинскиот премиер, Арсениј Јацењук, кој за еден германски ТВ канал рекол дека поранешен СССР ја нападнал Германија и Украина на крајот од Втората светска војна и дека на Москва нема да и биде дозволено повторно да ја пишува историјата. „Упативме нота до германското министерство за надворешни работи со барање да формулира официјален германски став по повод екстремистичките тврдења на премиерот Јацењук, кој отворено ја „фалсификува“ историјата“, изјавил денес пред новинарите рускиот заменик министер за надворешни работи, Владимир Титов. Јацењук за време на вчерашната посета на Берлин во интервју за телевизијата „АРД“ рекол дека „сите добро се сеќаваме на советскиот упад во Украина и Германија“. „Такво нешто е неопходно да се избегнува. Никој нема право да ги прецртува резултатите на Втората светска војна, но тоа се обидува да го направи рускиот претседател Владимир Путин“, рекол Јацењук.