МВР ТВРДИ - ги преземаме сите мерки и препораки за заштита на нашите вработени

Добивај вести на Viber

Откако од коронавирусот почина првиот припадник на Полицијата, односно 52 годишниот полицаец од Куманово, кој бил вработен на граничниот премин Белановце со Косово, од Министерството за внатрешни работи информираат дека во целост ги почитуваат и спроведуваат препораките и заклучоците на Владата во справување со коронавирусот.

„МВР е прва институција во државата која успеала во овој специфичен период да спроведе постапка за набавка на неопходните средства и опрема за заштита на полициските службеници, а паралелно со тоа преку дипломатски контакти успеавме да обезбедиме и дополнителна заштитна опрема која во целост е ставена и распределена  до сите Сектори за внатрешни работи“, велат од МВР во своето соопштение до јавноста.

Нагласуваат дека во изминатиов период, со цел да се обезбедат безбедни услови за нормално функцинирање и извршување на работните задачи, била извршена  и дезинфекција во просториите и објектите каде е утврдено дека престојувале вработени лица за кои е потврдено дека се позитивни на тестот за коронавирус, а тоа ќе се прави и за секој нареден случај.

„Исто така, според протоколите предвидени за вакви ситуации, од страна на епидемиолози направени се интервјуа и на вработени кои биле во непосреден контакт со заболените и во соработка со нив се утврдува за кои лица се издаваат решенија за изолација и изјави за самоизолација“, велат од МВР.

Од ова министерство нагласуваат дека во однос на исплатата на дополнителни средства на полициските службеници кои се наоѓаат на одредени пунктови, во целост се почитуваат правата на вработените на МВР и во вакви ситуации загарантирани во колективниот договор и во Законот за внатрешни работи .