На бела техника трошиме над 150 милиони евра годишно! Кој продава најмногу уреди за домаќинство?

Добивај вести на Viber

Нептун останува да биде неприкосновен на пазарот од аспект на остварените приходи. Поуспешен лани од аспект на добивка е Сетек, а најефикасен е Алфи Би кај кого добивка е 10% од приходот од продажба.

Телевизори со рамен екран, компјутери, таблети, „паметни“ машини за перење и сушење, шпорети со рамни плочи, еколошки и штедливи фрижидери, клима уреди и инвертери, мали слатки „гаџети“ за модерни домаќинки... Се ова е на асортиманот на големите продавачи на мало за бела техника. Минатата година продажбата на овие уреди во домаќинство без кои очигледно не можеме пораснала за 15 % односно околу 20 милиони евра повеќе од претходната 2020 година која на одбележа корона кризата.

 Според официјални достапни податоци од Централен регистар во Македонија има четири големи компании кои се занимаваат со малопродажба на уреди за домаќинството или популарно познати како „бела техника“.

Трендот на продажба покажува дека сме „конзумеристи“ и дека сакаме нова технологија и уреди за домаќинствата. Затоа што продажбата лани во споредба со 2020 година само тие четири големи ланци на маркети за малопродажба на бела техника е зголемена за 17 милиони евра односно за 13 отсто.

Споредбата на официјалните податоци покажува дека и понатаму неприкосновен во продажбата е најголемиот ланец маркети „Нептун“ , но најпрофитабилен (сооднос на приход од продажба и остварена добивка) е кумановски Алфи Би затоа што кај него на добивка отпаѓаат 10 отсто. При тоа вреди да се спомене дека токму овој ланец е најмал според остварените приходи од продажба. Најголема добивка лани (во апсолутен износ) има Сетек најголемиот ривал на Нептун.

foto freepik.com