Јавното сообраќајно претпријатие реагираше на денешната жалба на Коалицијата Менуваме, која имаше поплака дека денесека во автобус на јавниот градски превоз не му бил дозволен влез со своето куче сервис.
Од ЈСП велат дека Градскиот превоз е за сите граѓани и нема одлука за некаква
дискриминација, напротив, велат, работеле на позитивни новини за лицата со попреченост.
„Ниту на еден граѓанин не му е ускратено правото за јавен градски
превоз. Јавното сообраќајно претпријатие Скопје е јавен сервис кој обезбедува
градски превоз за сите граѓани и никогаш немало дискриминација. Нема никаква
поинаква одлука од онаа донесена пред две години каде се овозможува лицата со
попреченост кои имаат куче сервис да може да го користат јавниот превоз.
ЈСП во соработка со Град Скопје веќе започна сеопфатна програма за
подобрување на условите за превоз во јавниот сообраќај за лицата со попреченост
преку поставување ниски платформи за лица со попречености, со што јавниот
превоз би станал подостапен за истите.
Како јавно претпријатие отворени сме за средба со Александар
Велески за да ги презентираме нашите планови кои вклучуваат подостапен јавен
превоз за лицата со попреченост.
ЈСП Скопје и новата градска администрација веќе работат на
промените кои ќе донесат подобро за скопјани преку јавен градски превоз што во
вистинска смисла значи превоз за сите граѓани“, се вели во соопштението од ЈСП.
А, ова следува откако медиумите објавија реакција на коалицијата Менуваме. Од таму нагласиле дека на Александар Велески, лице со попреченост, денеска не му било дозволено да влезе во автобус на ЈСП со своето сервис - куче и тоа по наредба на Град Скопје и градоначалничката, со „што се прекршени законите и Уставот, како и Конвенцијата за правата на лицата со хендикеп на ОН“.
Во соопштението Коалицијата прашува каква е таа одлука и зошто не е објавена и се најавува реакција до меѓународните организации.