НА ПОВИДОК НЕМА ЕКСТРЕМНО ТОПОЛ БРАН: Навечер и наутро потребна ќе ни биде и топла облека, најнова метео прогноза за периодот што следи
Објавено во: Македонија 06 Август, 2023
Метеорологот Славчо Попоски излезе со најнова метео прогноза.
„ Од денес, па во текот на седмицата која е пред нас, следува период на значително постудено време. До крајот на денов и утре сеуште ќе има услови за локален дожд и услови за ретка појава на грмежи, а потоа времето ќе биде претежно стабилно и сончево.
Во периодот кој што е пред нас ќе дува и умерен до засилен ветер од западен и од северозападен правец.
Наутро особено ќе биде постудено со минимални температури кој на повеќе места ќе се спуштат до околу, па дури и под 10 степени, а во крајните југоисточни предели тие ќе достигнат до 16 степени. Максималните дневни температури ќе се искачуваат во интервалот од 23 до 32 степени во најтоплите југоисточни предели од државава.
Најсвежо преку ден ќе биде во вторник кога максималните температури ќе се искачуваат во интервалот од 20 до 29 степени. На повидок нема екстремно топол бран и екстремно високи температури на воздухот, а за ноќните, како и за утринските часови потребна ќе биде дури и потопла облека.
Во Скопје и околината следува период на значително посвежо време, а ќе биде претежно стабилно и суво со засилен ветер од северен и од северозападен правец. Наутро температурата ќе се спушта во интервалот помеѓу 11 и 16 степени, додека максималната ќе се искачува во интервалот помеѓу 26 и 30 степени.“, напиша тој.