На продажба ставени 10 отсто од акциите на централата ТЕ-ТО

Добивај вести на Viber

Топлификација АД Скопје објави дека продава свои удели од 10,8 отсто во гасната централа ТЕ-ТО и дека ќе бидат понудени на продажба во среда и четврток. Понудата е на барање на Комерцијална банка, а вредноста на акциите се со почетна продажна вредност од 17,6 милиони евра.

- Ве известуваме дека на 28.02.2024 година (Среда) и 29.02.2024 година (Четврток), на барање на членката Комерцијална Банка АД Скопје, по пат на јавна берзанска аукција на акции при продажба на големи пакети на акции (согласно Анекс 4 од Правилата за тргување на Македонска берза АД Скопје) од страна на продавачот Топлификација АД Скопје-во стечај ќе се понудат за продажба два пакети акции и тоа:

На 28.02.2024 година (Среда) ќе се понудат за продажба 25 обични акции издадени од ТЕ-ТО АД Скопје што претставува 10,00% од основната главнина на друштвото, со почетна продажна цена од 39.871.715,00 денари по акција преку моделот “се или ништо“. 

На 29.02.2024 година (Четврток) ќе се понудат за продажба 2 обични акции издадени од ТЕ-ТО АД Скопје што претставува 0,80% од основната главнина на друштвото, со почетна продажна цена од 39.871.715,00 денари по акција преку моделот “се или ништо“, гласи најавата за аукција на „Македонска берза“.

ТЕ-ТО АД Скопје работи со комбинирана централа во Скопје со топлинска енергија од 160 мегавати (MW) и капацитет за производство на електрична енергија од 220 MW. Постројката е во мнозинска сопственост на кипарската Битар холдингс лимитед, која пак е во сопственост на рускиот производител на електрична енергија ТГЦ-2.