НА ШАМПАЊ ПОТРОШИЛЕ РЕЧИСИ 104 ИЛЈАДИ ЕВРА - за настаните во Домот на лордовите купени се повеќе шишиња од минатата година
Објавено во: Свет 02 Јануари, 2024
Речиси 90.000 фунти (околу 103.751 евра) се потрошени за шампањско за настани во Горниот дом на британскиот парламент, Домот на лордовите, минатата година, што претставува најголема сума одвоена за оваа намена во последните пет години, пренесува Гардијан.
Детали за продажбата на вкупно 1.589 шишиња шампањ по цена од околу 56 фунти (околу 64,50 евра) се добиени од Шкотската национална партија (SNP), по барање за слободен пристап до информации.
Вкупната цена од 88.987 фунти (околу 102.583 евра) е нешто повисока од вкупната сума доделена во 2022 година, кога за девет шишиња помалку од ова се платени 85.462 фунти (околу 98.520 евра).
Новообјавените податоци, според СНП, докажуваат дека Домот на лордовите бил „архаичен и несвесен“ во време кога растела кризата со трошоците за живот.
„Парламентот, каде што неизбраните лордови земаат 342 фунти (околу 394 евра) на ден само за да се појават, не е способен правилно да го претставува народот“, рече Томи Шеферд, пратеник на Шкотската национална партија (СНП) за Источен Единбург, додавајќи дека податоците до кои неговата партија дојде, ќе предизвикаат гнев кај граѓаните.
„Гласачите ќе бидат огорчени кога ќе слушнат дека додека се бореле да го балансираат финансирањето на своите домаќинства и да платат за основните работи како намирници и енергија, неизбраните лордови точеле шампањ“, рече Шепард, истакнувајќи дека изминатата година беше обележана со криза на трошоците за живот во Вестминстер, која доведе до пад на животниот стандард и турна многу домаќинства во сиромаштија.
Од друга страна, портпаролот на Домот на лордовите тврди дека целиот алкохол, вклучително и шампањот, бил продаден на горниот дом на британскиот парламент со профит.
- Поголемиот дел од шампањот што се продава во Домот на лордовите го купуваат посетителите во продавницата за подароци или го продаваат на банкети на организации или поединци кои се домаќини на настани во Домот на лордовите, рече портпаролот, додавајќи дека „овие шишиња шампањ не се платени од парите на даночните обврзници“.
СНП нема застапеност во Домот на лордовите поради нивното противење на тој неизбран дом на британскиот парламент.
(Извор: Танјуг)